Қазақстанда алдағы республикалық референдум қарсаңында ел көлемінде «Есіктен – есікке» атты кең ауқымды ақпараттық-түсіндіру акциясы жүргізілуде. Бұл бастама азаматтарға алдағы саяси науқанның маңызын түсіндіруге, референдумға шығарылған мәселелер жөнінде жан-жақты ақпарат беруге және халықтың қоғамдық-саяси белсенділігін арттыруға бағытталған.
Аталған акция Бұланды ауданында да кең көлемде жүзеге асырылып келеді. Қоғамдық ұйымдардың өкілдері, еріктілер, жергілікті белсенді азаматтар және түрлі сала мамандары тұрғын үйлерді аралап, халықпен тікелей кездесу өткізуде. Олар тұрғындарға арнайы дайындалған ақпараттық-насихаттық брошюраларды таратып, референдумның мәні мен мазмұны туралы түсіндіру жұмыстарын жүргізіп келеді. Мұндай кездесулер ашық диалог форматында өтеді: тұрғындар өздерін қызықтырған сұрақтарын қойып, толық әрі нақты жауап алуға мүмкіндік алады.
«Есіктен – есікке» акциясының басты ерекшелігі – халықпен бетпе-бет сөйлесу арқылы сенімді әрі қолжетімді ақпарат жеткізу. Қоғамдық пікір көшбасшылары мен белсенділер әрбір азаматтың пікірі маңызды екенін атап өтіп, ел болашағына қатысты маңызды шешімдерге қатысу – әрбір адамның азаматтық құқығы әрі жауапкершілігі екенін түсіндіреді. Осы арқылы тұрғындардың референдумға деген қызығушылығын арттыру, қоғамда ашық талқылау мәдениетін қалыптастыру көзделген.
Мәселен, ауданның ауылдық мекендерінде акцияға деген қызуғышық байқалады. Сайлаушылар таратылып жатқан брошюралардан референдумның мақсаты, дауыс беру тәртібі, учаскелердің жұмыс уақыты және азаматтардың құқықтары туралы толық ақпарат алуда. Сонымен қатар, тұрғындарға дауыс беру процесінің қалай өтетіні, референдумның құқықтық маңызы мен оның елдің қоғамдық-саяси дамуына ықпалы жөнінде түсініктемелер ұсынылады.
Айтав кететін жайт, мұндай ақпараттық науқандар халықтың құқықтық сауаттылығын арттыруда маңызды рөл атқарады. Азаматтар өз құқықтары мен мүмкіндіктерін жақсы түсінген сайын, қоғамдық-саяси процестерге қатысу деңгейі де арта түседі. Ал бұл, өз кезегінде, елдегі демократиялық институттардың нығаюына ықпал етеді.
Акцияға қатысушылар тұрғындарды алдағы референдум туралы ақпаратпен танысып, өз ұстанымдарын саналы түрде қалыптастыруға шақырады. Олар әрбір азаматтың дауысы маңызды екенін, ал халықтың белсенділігі қоғамның тұрақты дамуына және мемлекет болашағына әсер ететінін атап өтеді.
Жалпы алғанда, «Есіктен – есікке» акциясы – халық пен қоғам белсенділері арасындағы байланысты күшейтетін, азаматтарды ел өміріндегі маңызды оқиғалардан хабардар ететін тиімді ақпараттық алаң. Осындай бастамалар арқылы тұрғындар мемлекеттік маңызы бар мәселелер туралы көбірек білуге, өз көзқарасын білдіруге және қоғамдық диалогқа қатысуға мүмкіндік алады.
Алдағы референдум – ел тарихындағы маңызды кезеңдердің бірі. Сондықтан азаматтардың ақпараттандырылған түрде шешім қабылдауы, қоғамдық пікірдің ашық әрі өркениетті түрде қалыптасуы ерекше мәнге ие.
А. АМАНЖОЛОВА.