Щучинск жоғары техникалық колледжінің 90 жылдығына орай облыстық ғылыми-практикалық конференция өтті. Іс-шара «Заманауи жастар – Қазақстанның индустриалды-техникалық дамуының кепілі» деген ұранмен өткізілді, деп хабарлайды Өңірлік коммуникациялар қызметі облыстық білім басқармасына сілтеме жасап.
Оқу орнының тарихы 1934 жылдан бастау алады, сол кезде Кеңес Одағының Халықтық ауыр өнеркәсіп комиссариатының бұйрығымен Степняк қаласында тау-кен-металлургиялық техникум ашылған болатын. Бір жылдан кейін оқу орны Щучинск қаласына көшіріліп, Щучинск тау-кен-металлургиялық техникумы деп аталды. Алғашқы түлектер 1938 жылы шығарылды: 21 техник-кенші және 24 техник-металлург оқу бітірді.
Бүгінгі күні Щучинск жоғары техникалық колледжі Ақмола облысының жетекші білім беру мекемелерінің бірі болып табылады.
«Бурабай ауданындағы колледж түлектерінің шамамен 40%-ы біздің студенттеріміз. Колледж 12 мамандық және 16 біліктілік бойынша мамандар даярлайды. Қазіргі таңда колледжде 944 студент оқып жатыр, оның 398-і дуалды оқыту бағдарламасымен қамтылған», — деп атап өтті оқу орнының басшысы Әсел Рақымжан.
Мерейтойлық шараға өңірдің білім беру мекемелерінің өкілдері, Көкшетау, Атбасар, Бурабай, Ақкөл, Сандықтау, Есіл, Аршалы және Зеренді колледждерінің студенттері мен оқытушылары қатысты.
Конференцияның пленарлық бөлімінде қонақтардың құттықтаулары болды. Бурабай ауданының әкімі Арай Садыков, ғылыми-әдістемелік орталықтың жетекшісі Сауле Сералина, «Азиякотломаш» ЖШС бас инженері Сергей Медведев және шеф-кондитер Ирина Мельник колледждің өңір дамуына қосқан үлесін жоғары бағалады.
Оқу орнының ұжымы Қазақстан Республикасы білім вице-министрі Наталья Жұмадильдаева, «Talap» ҰҚ жетекшісі Санжар Таттибеков және облыстық білім басқармасының басшысы Айнагүл Балташева тарапынан алғыс хаттармен марапатталды.
Конференцияның жұмысы екі секцияға бөлінді. Бірінші секция – педагогикалық шеберхана, онда инженерлік пәндерді оқытудың инновациялары талқыланды. Екінші секция – студенттердің ғылыми әлеуеті, мұнда студенттер өздерінің ғылыми жобаларын таныстырып, қоғамдық сөйлеу тәжірибесін алды.
Конференцияға қатысушылар агрономия, экология, медицина, инженерия, экономика және басқа да салалардағы өзекті мәселелерді талқылады. Нәтижесінде конференция материалдарының электрондық жинағы шығарылды. Барлық қатысушылар Ақмола облысының білім басқармасы атынан сертификаттармен марапатталды.
Айта кету керек, Щучинск жоғары техникалық колледжі өңірдің техникалық білім саласында көшбасшылық орнын сақтап қалуда, Қазақстан еңбек нарығында сұранысқа ие мамандар даярлауды жалғастыруда. 90 жылдық мерейтой – тек қорытындылау ғана емес, сонымен қатар заманауи индустриалды қоғам жағдайында білім беру жүйесінің дамуы үшін болашақ қадамдарды белгілеуге мүмкіндік болды.