Волонтерлік қозғалыс жауапты азаматтық қоғам қалыптастыруда маңызды рөл атқарады. Бұл қағиданы Көкшетау жоғары көпсалалы азаматтық қорғау колледжінің студенттері іс жүзінде дәлелдеп келеді. 2022 жылдан бері жұмыс істеп келе жатқан «Жайнар» волонтерлік клубы әлеуметтік маңызы бар жобаларды жүзеге асыруда алдыңғы қатарлы ұйымдардың біріне айналды.
Бұл студенттік бірлестік Ақмола облыстық «Бірлік» мүгедектер одағымен тығыз байланыста жұмыс істейді. Клуб еріктілері осы ұйымның жедел желісіне түскен өтініштерге шұғыл әрекет етеді. Көмекке мұқтаж жандар тек мүмкіндігі шектеулі адамдар ғана емес, жалғызбасты қарттар да бар. Көп жағдайда болашақ құтқарушылар өздері де бастамашылық танытып, көмек сұрауға ұялатын жандарға қолдау көрсетеді.
Жобаға колледждің тәрбие жұмысы жөніндегі директорының орынбасары Гүлжанар Шайхина жетекшілік етеді.
«Клубтың негізгі мақсаты – студенттердің белсенді азаматтық ұстанымын қалыптастыру, олардың адамгершілік қасиеттерін, бастамашылдығын дамыту. Клуб қызметі жетім балаларды, мүмкіндігі шектеулі жандарды, қарттарды қолдауға бағытталған. Волонтерлік жұмысқа қатысу студенттердің жеке тұлғалық дамуына, шығармашылық әлеуетін арттыруға және әлеуметтік жауапкершілігін нығайтуға ықпал етеді. Колледж басшылығы «Жайнар» клубының бастамаларын әрдайым қолдап, материалдық және ұйымдастырушылық көмек көрсетеді, – дейді Гүлжанар Жақсылыққызы.
Қысқа мерзім ішінде «Жайнар» волонтерлері елорда маңындағы өңірде өздерінің еңбегімен үлкен танымалдыққа ие болды. Мәселен, өткен жылдың желтоқсан айында колледж студенті Серік Танатбаев волонтерлік қызметке қосқан үлесі үшін медальмен марапатталды. Алайда, бұл клубтың жетістіктерінің тек біреуі ғана.
«Жайнар» клубының мүшелері Көкшетау қаласындағы арнайы әлеуметтік қызмет көрсету орталығының тәрбиеленушілеріне арнап қайырымдылық акциясын ұйымдастырды. Волонтерлер балаларға арналған концерттік бағдарлама әзірлеп, олардың күндерін жарқын сәттермен толықтырды. Мұндай шаралар студенттерге ізгілік, мейірімділік, жауапкершілік сияқты маңызды қасиеттерді сіңіруге көмектеседі.
Белсенді жастардың еңбегі жыл сайын елеп-ескеріліп келеді. «Жайнар» клубы Ақмола облыстық ішкі саясат басқармасы ұйымдастырған «Qamqor» номинациясында арнайы жүлдеге ұсынылып, «Жайнар-бокс» бастамасы үшін 200 000 теңге көлеміндегі грантты жеңіп алды. Бұл жоба белсенді түрде жүзеге асырылып жатыр.
«Жайнар» волонтерлік клубының игі істері жастардың жанашырлығын көрсетіп қана қоймай, қоғамдағы әлеуметтік жауапкершілік деңгейін арттыруға зор үлес қосуда.