Облыстық ауыл шаруашылығы қызметкерлері кәсіподағының төрағасы Тлепберген Айкенов Мемлекет басшысы Қасым-Жомарт Тоқаев жариялаған Жұмысшы мамандықтар жылының негізгі міндеттері мен бағыттарын баяндады, деп хабарлайды Өңірлік коммуникациялар қызметінен.
«Бұл – уақтылы әрі әділетті шешім. Ол кәсіподақтар, үкімет пен жұмыс берушілер арасындағы серіктестікті нығайтып, миллиондаған қазақстандық үшін лайықты еңбек жағдайын жасауға бағытталған ортақ мақсатқа жол ашады», – деді Айкенов.
Оның айтуынша, нақты сектордың дамуы білікті жұмысшы кадрларсыз мүмкін емес. Алайда бүгінде қол еңбегімен байланысты мамандықтардың қоғамдағы беделі төмендеген. Жастар мұндай мамандықтарды сирек таңдайды, ал жағдайды тек жекелеген шаралармен өзгерту қиын.
«Адам тек экономикалық емес, әлеуметтік мәні бар тұлға. Егер қоғамда ‘қол еңбегі – екінші сорт’ деген түсінік сақталса, біз тұрақты экономика құра алмаймыз», – деді спикер.
Тлепберген Айкенов жалақыны көтеру тек бір қадам екенін, ең маңыздысы мамандықтар туралы қоғамдық көзқарасты өзгерту екенін атап өтті:
«Бұл ұзақ мерзімді, жүйелі жұмыс. Біз мектеп қабырғасынан бастап балаларға түрлі мамандықтар туралы айтып, еңбек жолында табысқа жеткен тұлғаларды үлгі етіп, өндіріс орындарын таныстыруымыз керек», – деді ол.
Кәсіподақтар кәсіптік-техникалық білім беру жүйесіне ерекше назар аудармақ. Бұл жүйе қазіргі заман мен экономика сұранысына сай бейімделуі тиіс. Сондай-ақ кәсіподақтар заңнамалық актілерді жетілдіру және Парламенттегі «Еңбек» депутаттық бірлестігімен диалог жүргізу ісіне белсенді қатысатын болады.
«Қоғам игілігін жасайтын еңбек адамы мұқтаждық көрмеуі керек. Оның табысы тек күнделікті қажеттіліктерін емес, өзін-өзі дамытуға да мүмкіндік беруі тиіс», деді Айкенов.
Ол Қазақстан кәсіподақтары еңбек құқықтарын кәсіби қорғаумен айналысатын ірі қоғамдық күш ретінде Жұмысшы мамандықтар жылы аясындағы міндеттердің жүзеге асуына өз үлесін қосуға дайын екенін жеткізді.
«Еңбек адамы – экономикалық өсімнің негізі. Ал оған деген құрмет оның еңбегінің құндылығын мойындаудан басталады», – деп түйіндеді кәсіподақ төрағасы.