Астрахан ауданы су тасқыны қаупі жоғары аймақтардың қатарында болғандықтан, тәулік бойы бақылауда. Көктемгі су тасқыны кезеңіне мұқият дайындық жүргізілуде. Жергілікті биліктің айтуынша, алдын алу шаралары өткен жылдардағы тәжірибеге сүйене отырып жасалған, бұл туралы аудан әкімінің орынбасары Руслан Мұқанов мәлім етті, деп хабарлайды Өңірлік коммуникациялар қызметінен.
Аудандағы 10-ға жуық елді мекен өзен жағалауларында орналасқандықтан, су тасқыны қаупі бар. Өзен суларының көтерілуіне халық бейімделгенімен, өткен жылы аймақ бір ғасырда алғаш рет еріген қар суларынан зардап шекті. Ол кезде кейбір үйлерде су деңгейі 1,5 метрге дейін жеткен. Сондықтан азық-түлік пен қорғаныс құралдарының жетіспеушілігін болдырмау үшін материалдық-техникалық базаны нығайту туралы шешім қабылданды.
«2025 жылғы су тасқынына қарсы іс-шаралар аясында аудан бюджетінен 33 мың литр жанар-жағармай, 15 мың қап, 13 мотопомпа, 100 қысымдық жең, электрогенератор, жылу станциясы сатып алынды. Азаматтарды хабардар ету үшін дабыл сиренасын орнату жоспарланған. 2024 жылғы су тасқыны жағдайын ескере отырып, 550 тонна инертті материал мен 241 тонна құм сатып алынуда. Қосымша 5000 литр бензин, 8 дана су өткізбейтін арнайы костюм, 30 дана жартылай комбинезон, 10 құтқару жилеті, 2 құтқару шеңбері, квадрокоптер мен мотопомпалар алуға қаржы бөлінді», – деді Астрахан ауданы әкімінің орынбасары Руслан Мұқанов.
Аудандағы су қоймаларында жару жұмыстары жүргізу жоспарланған. Ең қауіпті аймақтардан тәулік бойы қар шығару жұмыстары атқарылуда. Қазіргі таңда 10 елді мекеннен 35 мың текше метрден астам қар шығарылды.
«Өткен жылдардың талдауына сәйкес, су тасқыны қаупіне негізінен Старый Колутон, Колутон, Ягодное, Новый Колутон, Жанатұрмыс, Астраханка, Жалтыр, Оксановка, Зеленое және Қоскөл ауылдары ұшырайды. Астрахан ауданы бойынша 18 іс-шара анықталды: 12-сі – елді мекендерде, төртеуі – жергілікті маңызы бар автомобиль жолдарында, екеуі – аудан аумағындағы гидротехникалық құрылыстарда», – деп толықтырды спикер.
Барлық жоспарланған жұмыстар орындалды. Колутон өзенінің екі учаскесінде тереңдету жұмыстары жүргізіліп, тамырлы ағаштар мен бұталар алынып тасталды. Қауіптің сақталуына қарамастан, аудандағы жағдай тұрақты, ал жергілікті билік халықты су тасқынынан қорғауға толық дайын.